Home / Archives / ساہ کندن-عطاشاؔد
ata shaad poetry-balochistanaffairs.com

ساہ کندن-عطاشاؔد

 

 

ساہ کندن ءِ چم پاچی ءُ بیوانکی ءَ استنت زبان

چمّے بہ بیت پہ گندگ ءَ

گوشے بہ بیت پہ اشکنگ

امبروز ءِ گْراں باہندیں آشوب عاقبت اوبادگاں پہ ساعت انت

ساہ کندن ءِ

 

گندنت ءُ بے روک انت چمّ

کرّ انت بلے گوش اشکننت

ساہ انت ءُ بیگواہ انت زند

 

گند قہر ءُ مہر ءِ آدمی گستائی ءَ

ارواہ ءِ چیہانٹاں سر ءَ زرتگ جہان

کرّ انت تئی گوش ءُ منی گنگ انت زبان

تو چوبدل زرتیں زبان ءِ منّت ءَ بے باورئے

من چوزمیں جمبانی قہریں نیت ءَ پیداوراں

توپہ سگاراں گپتگیں کوٹ ءُ کلاتان گلے

من پہ پتی میراث ءُ ماتی گلزمین ءَ تلوساں

من آدم ءِ اوبادگاں

مہرانی حقّیں وارثاں

راستے کہ تئی سوب ءَ من ءَ مرگی کتہ

شاتے کہ تئی زوراکی ءَ  زند ءِ یلیں بچّے جتہ

بچّ آجوئی

بچّ ایمنی

بچّ گل زمین ءِ دیدگ ءُ زرد ءِ مراد

بچّ غم جتیں بنی آدم ءِ رکینگ ءِ جہد ءِ مراد

بچّ دیر مانیں شادہ ءِ شوہازگ ءِ مزد ءِ مراد

بچّ زند ءِ مہر ءِ محبتی ارمان

مستاگی عذاب ءِ آسر ءِ

تو پہ سرانی گڈگ ءَ زند ءِ حیالان ءَ کُشئے؟!

پہ سندگ ءَ داشت کنئے پُلّ ءَ چہ بوتالانی ءَ !!

مرک ءَ منی لوٹئے، تہ اروہ ءَ بکش

کوش ءَ منی باڑائے، مہر ءِ واہگاں پاہو بدے

بیگْواہی ءَ زہرے،  بکن رژن ءَ منیگ ءَ ایر جیگ

زانت ءَ بکن تیر ءِ نشان

ہار ءَ مہ جلّ،  ہور ءَ بدار

جون ءَ مہ گند، حون ءَ بچار

من پہ مرگ گارنہ باں

مہران کہ آوارنہ باں

دان عاقبت استنت منی گامانی رَند

داں زندبیت روک انت منی حونانی لیک

مرک و  ودیگ ءِ درد یک

است ءِ مثال انت نیستی

بیت و نہ بیت انت واہگ ءِ ناپیلہی

تنکہ بنی آدم زریت

پہ رُژن و  زانت ءِ ایمنی

پہ آگہی

پہ آجوئی

زوراکی ءِ آس ءَ  سُچیت

بندیگی ءِ زہر ءَ  چشیت

تیرشانی ءِ آماچ بیت

ماں پاہواں گٹ گیر بیت

من مرتگاں، توہم مرئے

تو زندگ ءِ، من زندگاں

بشکُن منی گنگیں زبان ءِ زیمل ءَ

بیا عاقبت ءَ گوں منی چماّں بگند

دُور ماں تہاروکیں شپ ءِ جُہلیں زرءَ

روک انت چو آچار ءَ چراغ

ماں کندی ءِ  حُشکاوگ ءَ

زوراکی ءِ زرتہ تلام

مہر ءِ یلیں پیغمبراں

ظلم ءِ سگار انت سرشکون

رژن ءِ گروک انت شہمگ ءَ

قہر انت چو کرسیں بوجی ءَ

آشوب ءِ شرتگ ایمن انت

دُور ماں حدوک ءِ منزل ءَ

مہرانی گْوربام ءِ گلاب درنزیں سمین

زند ءِ اول روش ءِ گلیں مستاگی انت

Share on :
Share

About Administrator

Check Also

Shadow of ‘engineering’ hangs over Pakistan election

Political leaders in Balochistan province claim they are being threatened to switch parties, alleging army …

Leave a Reply

'
Share
Share
Social Media Auto Publish Powered By : XYZScripts.com