Home / Archives / Analysis / بلوچانی نمائندگی ءِ حق دار کئے انت؟

بلوچانی نمائندگی ءِ حق دار کئے انت؟

شگراللہ یوسف

25جولائی ءَ ماں بلوچستان ءَ ووٹ بیت بلے بلوچستان ءِ ووٹ ءُ چوٹ چہ پاکستان ءِ ووٹ ءُ الیکشناں جتا انت۔ چیا کہ گوستگیں چاردہ سال
انت کہ بلوچ گوں پاکستان ءَ جنگ ءَ انت۔ اے جنگ ءِ آس ءَ پورہیں بلوچ ڈیہہ سچگ ءَ انت۔
پاکستان ءِ پارلیمانی سیاست ءَ بلوچ بازرنداں رد کپتگ انت۔ اولی ردی 1977ءَ بوتگ آ بھٹو ذوالفقار علی ءِ دور بوتگ۔ آ وہداں بلوچانی
سیاسی پارٹی نیپ (نیشنل عوامی پارٹی)ءِ سرا بندش جنگ بوتگ ات ءُ بلوچ ءُ پٹھان لیڈر ماں حیدرآباد ءِ زندان ءَ بند اتنت۔ مئے سروکاں کلوہ ءُ پیغام کتگ ات کہ بلوچ گچین کاریاں بہر مہ زورانت تاں آ چہ جیلاں در کنگ مہ بنت۔ بلوچاں بہر نہ زُرت۔ نتیجہ ایش بوتگ کہ پاکستان ءِ ریاست ءَ چہ بلوچاں ہنچیں مردم ووٹ ءِ نام ءَ ماں اسمبلیاں آئورت کہ آ بلوچانی نمائندگ نہ اتنت۔ سرکار ءِ وفادار ءُ نمائندہ اتنت ءُ تاں روچ ء مرچی ہمے مرد بلوچانی سرا پہ لیڈری چٹی انت۔ دومی ردی 1985ءَ بوت کہ بلوچاں جنرل ضیاالحق ءِ غیر پارلیمانی گچین کاریاں بہر نہ زرت ءُ یک وارے پدا ایجنسیانی مردم بلوچ ءِ نام ءَ اسمبلیاں سر بوت انت کہ سرکار ءَ آہان ءَ بلوچانی حلاف ءَ کارمرز کت۔ ہمے مجلس شورا ءِ رئوک مروچی ہم بلوچ ءِ نمائندگی ءِ دعوی دار انت۔ سیمی ردی 2008ءَ بوت کہ بلوچ قوم دوستیں پارٹیاں گچین کاریاں بہر نہ زُرت ءُ سرکاری ادارہاں ہما مردم آئورت انت کہ گُنگ اتنت ءُ کور ہم، چیا کہ آہاں بلوچانی جنگ ءُ پروشگ ءِ کاراں ہچ نہ گوشت۔ نی پاکستان ءِ سرکاری ادارہاں شریں سوبے دپ ءَ کپتگ ات آہاں 2013ءِ گچین کاریاں قوم دوستیں بلوچ پارٹیانی امیدواران ءَ سوبین بوئگ ءَ نیشت ءُ’’  ٹپہ ماری ‘‘ کت ءُ وتی ایجنٹ اسمبلیاں آئورت انت۔ اے ردی ءَ مئے بلوچیں ورنا ہم ہور بوت انت کہ آہانی نام ءَ مخلوق ءَ را گوشگ بوت کہ ووٹ ءَ مہ رو اِت۔ تیوگیں پاکستان ءَ ووٹ بوت بلے آواران پنجگور ءُ تربت ءِ ضلہاں سرکار ءُ آئی ءِ پالسیانی پلہ مرزیں مرداں بلوچان ءَ تُرسینت ءُ ووٹ ءَ نیشت۔ نتیجہ ایش بوت کہ چہ اے علاقہاں بلوچانی نمائندگانی بدل ءَ سرکاری مردم اسمبلیاں شت انت ءُ ہما کاراں سرکار ءِ ہمراہ داری ایش کت کہ آ بلوچ قومی وجود ءُ بلوچ ڈیہہ ءِ خلاف بُوتگ انت۔اے ردی باید انت کہ دوار کنگ مہ بنت۔ بلوچ سرکاری ایجنٹانی بدل ءَ بلوچ دوستیں نمائندگان ءَ گچین بہ کن انت تاں کہ آ بلوچ ءِ جنگ ءُ پلگ ءُ خرید ءُ فروخت ءَ گون مہ بنت۔
اے گچین کاریاں سردار اخترمینگل ءِ پارٹی بلوچستان نیشنل پارٹی بہر زورگ ءَ انت۔ چہ اے پارٹی ءِ نیمگ ءَ تربت ءِ قومی حلقہ ءَ بلوچ دانشور، زانت کارءُ زبان زانت میر جان محمد دشتی امیدوار انت۔ پہ بلوچ ءُ بلوچستان ءَ واجہ دشتی ءِ کرد چہ کس ءَ چیر نہ انت۔ پہ بلوچی زبان ءِ دیمری ءَ آئی ءِ حذمتاں ہر کس معلوم دار انت۔آئی ءِ مڑاہ داری، ایمانداری ءُ وطن دوستی بلوچانی تاریخ ءِ نمیرانیں بہرے۔ آ ءُ آئی ءِ خاندان گوستگیں(60) شست سال ءِ دئوراں گوں قوم دوستیں پارٹیاں ہم کار بوتگ۔ واجہ دشتی پہ ہمے جرم ءَ گونڈانی ءَ دپار ہم بوتگ بلے پاکستانی ادارہ ءُ ہمے ادارہانی کارندہاں یک مہم یے شروع کتگ کہ واجہ دشتی الیکشناں بہر مہ زوریت چیا کہ اگں اسمبلی ءَ رئوت آہچ کت نہ کنت۔بلوچانی جنگ ءُ پروشگ ءَ پاکستان ءِ دستاں داشت نہ کنت، بلوچ ءِ لٹ ءُ پُل ءَ داشت نہ کنت۔ بلوچستان ءِ مڈی ءِ روپگ ءُ برگ ءِ کاراں داشت نہ کنت۔ چو کہ واجہ دشتی دانشور ءُ لبزانتے آ سیاست ءَ بہر مہ زوریت ءُ آ وت ءَ را چرے کار ءَ دور بہ داریت۔
اے حبر یا دلیل نوہ ماہ ساری چہ سرکاری پارٹیانی نیمگ ءَ دیم ءَ آرگ بوت۔ ہما وہداں کہ میر جان محمد دشتی ءَ گوں بلوچ دانشور، ادیب، زانتکار ءُ نوشتہ کاراں صلاح ءُ شور بنا کت کہ چو کہ بلوچ تاریخ ءِ داتگیں گرانیں مشکلے ءَ دوچار انت چرے جوکم ءَ دراہگ ءِ توجیل چے بہ بیت۔ ہمے شور ءُ صلاہانی درگت ءَ وہدیں ماں بلوچاں ریاستی ادارہانی دوزواہیں مرداں معلوم بوت آہاں پروپیگنڈہ بنا کت کہ میر جان محمد دشتی باید انت کہ ووٹاں بہر مہ زُوریت۔
اے حبر کہ ادیب ءُ لبزانت زانتکار ءُ دانشور، قوم دوست ءُ وطن دوست باید انت کہ سیاست ءَ بہر مہ زورایت ءُ چہ وتی چاگرد ءُ مہلوکاں گستا بہ بیت آہانی مشکل ءُ جنجالانی آسان کنگ ءِ توجیل در مہ گیجیت ءُ پہ وتی راج ءَ یک شریں بانداتے ءِ جہداں گوںمہ بیت پوچیں حبر انت۔ چوشیں دلیل ءُ حبر بلوچ ءِ بدواہانی پلہ مرزی کنگ انت۔ اے مرد گوش انت بلوچ ءِ ہما دانشور شر انت کہ آ بلوچانی پلہ مرز مہ بیت بلے چوشیں دلیل ءِ منوگریں مردم باید انت تاریخ ءَ بہ واننت۔ فلسفہ ءِ شہہ زانت افلاطون ءَ سیاست ءِ راہ ءُ راہ بندانی باروا کتاب ءُ نبشتانک بنشتہ کنگ ءَ ابید سیاست ءَ ہم بہر زرتگ۔ برطانیہ ءِ سر وزیر ونسٹن چرچل، امریکہ ءِ صدر ابراہیم لنکن ، فلسفہ زانت برٹرینڈ رسل،چلی ءِ پابلو نرودا ، مات گدار ءِ نبشتہ کار میکسم گورکی ہم گون انت کہ نہ ایوکا وتی دئور ءِ نامی ایں لبزانت ءُ زانتکار بوتگ انت بلئے سیاسی چست ءُ ایراں ہم گون بوتگ انت۔ ہندوستان ءِ جواہر لعل نہرو، روس ءِ لینن ءُ چین ءِ مائوزے تنگ زانتکار ءُ فلاسفر بوتگ انت۔
بلوچستان ءِ قومی وت واکی ءِ سیاسی جنزءِ سرخیل میر یوسف عزیز مگسی ءُ عبدالعزیز کرد  لبزانت ءُ نبشتہ کار بوتگ انت بلے شاہ شمس ءِ ظلم ءُ زوراکیانی حلاف ءَ سیاسی پڑءَ ہم سرگرم بوتگ انت۔ بابو کریم شورش، شیر محمد مری، میر گل خان نصیر، میر غوث بخش بزنجو، سردار عطااللہ مینگل ، نواب خیر بخش مری ءُ اکبر بگٹی زانتکاریں مردم بوتگ انت ءُ آہاں پہ بلوچانی حق ءُ وت واجہی ءِ سیاست کتگ گڈا چے گوشگ بیت اے دراہیں زانتکاراں سیاست مہ کتیں ءُ بلوچ ءِ گپ مہ جتیں۔
دانشور آ نہ انت حیالی دگنیا ءَ بہ بیت۔ زانتکار آ نہ انت کہ بلوچ ءِ درداں مہ ماریت۔ شاعر آ نہ انت کہ شر ءَ شر مہ گوشیت۔زانتکار ءُ دانشور باید انت کہ قومی کاروان ءَ ہم گرنچ بہ بنت۔ بلوچ ءِ درد ءُ مرگ ءَ وشی ءُ تناباں گون بہ بنت۔ بلوچ ءِ نمائندگی ءِ حقدار بلوچ ءِ وانندگ، زانتکار ءُ مڑاہ داریں قوم دوستیں بامرد انت سرکاری دلار ءُ ایجنٹ نہ انت۔
ہمے مرد ءُ آہانی پارٹی کہ گچین کاریاں بہر زور انت پراہاں ہمے شرّیں عملے بلے آہانی دل ءَ قوم دوستیں، زبان دوستیں ءُ پہ بلوچاں جان ءُ سر ءِ قربان کنگ ءَ نہ ترسوکیں مرد اسمبلیاں مہ رو انت۔ چندیں وہداں رند ہمے دلیل بازیں دگہ مرداں وتی کُت لہتیناں پہ ردی ءُ نزانتکاری ءُ لہتیناں پہ زانت ءُ کست۔ آہانی دل ءَ ات کہ اگں بلوچ دوزواہیں مردم اسمبلیاں بہ رو انت ءُ بلوچ ءِ نمائندگی بہ کن انت سرکاری دلار ءُ ایجنٹانی حیثیت کم بیت۔ آہانی بلوچانی خرید ءُ فروخت ءِ نفع بخشیں کار کوٹی بنت۔
بلوچانی سیاسی زانتکار ءُ مڑاہ داریں مرداں ہمے فیصلہ کتگ کہ بلوچ علاقہانی درستیں سیٹانی سرا آ ووٹ ءَ بہر زور انت۔ آ نیلنت کہ روچ ء رحمانی ءُ دیدہ درائی ءَ سرکاری ادارہانی مردم ءُ آہانی ایجنٹ ٹپہ بہ جن انت ءُ بلوچانی نمائندگی ءِ حق ءَ پچ بہ گر انت۔ آ اے حبر ءَ سرپد انت کہ آ بلوچانی جنگ ءَ دژمن ءِ دستاں داشت نہ کن انت بلے پہ بلوچ ءِ جنگ ءَ گوں دژمن ءَ ہم کا رنہ بنت۔ آ بلوچانی مال ءُ مڈی ءِ پلگ ءَ گون نہ بنت۔ بلوچ سرزمین ءُ آئی ءِ مڈی ءِ خرید ءُ فروخت ءِ کاراں گوں بلوچ بدواہاں ہم کار نہ بنت۔ آ کرپشن ءُ مالواری ءُ بلوچءِ مڈی ءِ پلگ ءَ گوں بدواہ ءَ حصہ دار نہ بنت۔ آ بلوچ ءِ بچ ءُ آئی ءِ شریں آئندگ ءِ حاطر ءَ گوں بلوچ ءَ ہم کوپگ بنت۔
اے دلیل کمزوریں ءُ پستیں ذہنانی پیداور انت کہ اسمبلیاں شریں مردانی جاگہہ ءَ سرکاری ایجنٹ ءُ بلوچانی بدواہ بہ نند انت تاں کہ بلوچ ننگ ءُ نام ءِ خرید ءُ فروخت آسان بہ بیت۔ ہما مرد بہ نند انت کہ نا پہ وت ءَ نام ءُ ننگ ئے دار انت ءُ نا پہ بلوچاں۔
اے گرانیں وہداں بلوچانی چم پہ راہنمائی ءُ راہ در بری ءَ سردار اخترمینگل ءُ آئی ءِ مڑاہ داریں ہمراہ میر جان محمد دشتی ءَ سک انت۔ حدا انت کہ اے بامرد پہ بلوچانی مقصداں سوبین بہ بات انت چیاکہ ماں بلوچستان ءَ ہمے پارٹی ءُ آئی ءِ راہنما انت کہ بلوچ ءِ امیت انت۔
مئے دل ءَ ہر کس کہ بلوچ ءِ دوزواہ انت بلوچ ہما مرداں گچین بہ کن انت کہ بلوچ ءِ دوزواہ بہ بنت۔آپہ بلوچاں شریں ءُ مڑاہ داریں نمائندگ ءِ گچین کنگ ءِ پلہ مرز بہ بنت، آمرداں ووٹ مہ کن کہ بلوچانی دوزواہ نہ انت۔
(نبشتہ کار بلوچی ءِ لبزانت ءُ ریڈیو ءَ بلوچی ریڈیو ءَ پروگرامانی کمپیئرانت۔)
ای میل ایڈریس :   shugrullahbaloch@gmail.com
Share on :
Share

About Administrator

Check Also

پی ایس ڈی پی بارے آگاہ کیا جائے، بی ایس پروگرام پر صوبے بھر میں یکساں عمل درآمد کیا جائے، بلوچستان اسمبلی

کوئٹہ: بلوچستان اسمبلی کا اجلاس چالیس منٹ کی تاخیر سے ڈپٹی سپیکر سردار بابر موسٰی …

Leave a Reply

'
Share
Share
Social Media Auto Publish Powered By : XYZScripts.com