Home / Archives / Analysis / مذہب ءِ نام ءَ بلوچانی میڑینگ ءِ پندل ءُ پندل ساز ((اولی بہر))

مذہب ءِ نام ءَ بلوچانی میڑینگ ءِ پندل ءُ پندل ساز ((اولی بہر))

عبدین ولی
مذہب گوں بنی آدم ءِ وشی ءُ گمی آں ہوار زند ءِ ہمک تہراں ہمگرنچ انت۔ پمیشکہ بازیں دپ وشیں ملّا ءُ سیاسی رہشون ایشی ءَ را پہ وتی مطلباں انچوش کارمرز کن انت کہ گمان بیت ایشاں دین ءِ گم چہ ہر کس ءَ گیشتر پر اِنت بلئے بندر ءَ اے دین ءِ رکّینگ ءِ گم نہ انت بلکن ءَ در پشت ءَ وتی ذاتی نپ ءُ فائدگانی جنگ انت۔

چہ مذہب ءَ ذاتی نپ ءُ فائدگ گرگ ءِ راجدپتر سک کوہن انت بلئے من اے نوشتانک ءَ ایوکا مملکت اللہ داد ءِ جوڑ بوہگ ءَ بہ گر تاں روچ ء مرچی ہمے ناوانندہیں ملّا ءُ شتلیں سیاسی دزّ ءُ ڈنگاں مذہب چوں پہ وتی نپ ءُ سیتاں کارمرز کتگ، چمشانکے دئیگ لوٹاں۔
ہندوستان ءِ مسلم لیگ ءِ لیڈر ءُ رہشوناں وہدے جتائیں ملکے ءِ لوٹ کُت گڈا جمعیت علمائے ہند، جماعت اسلامی ءُ مجلس احرار وڑیں مذہبی ٹولیاں ایشی ءِ مخالفت کت ءُ دلیل دات کہ مسلمان یک اُمتّے ، ایشی ءِ دو بہر کنگ گناہ یے۔وہدیکہ ملک جوڑ بوت ہمے ملّا ءُ آہانی پارٹی ایشی ءِ وارث ءُ واہند بوت انت ءُ سیاست ءَ دور اش کت۔ ہما روچ انت کہ تاں روچ ء مرچی اے گروہ ءُ جماعت وڑے نہ وڑیءَ سرکار ءُ سرکاری اگدہانی سرا نشتگ انت۔

1977ءَ ضیاالحق ءَ مارشل لا جت ۔ آئی ءَ پہ وتی اقتدارءِ برجم دارگ ءَ ملّاہان ءَ ہمراہ کتءُ شریعت ءِ نعرہ جت۔ اے گامگیج اصل ءَ ماںملک ءِ سیاست ءَ مذہب ءِ کارمرز کنگ ءُ وتی حاکمی ءِ برجم دارگ ءِ بندات ات۔ 1980ءَ مذہبی تب ءُ مئیل گیش بوت انت ، اوگاناں روس ءِ حلاف ءَ جنگ بندات کت۔ امریکہ ءَ روس ءِ دیم ءِ دارگ ءَ پاکستان ءِ حاکمانی کمک کت۔ زرّ ءُ مال دات، اسلحہ داتءُ ملّاہان ءَ جنگی ٹریننگ دات کہ افغانستان ءَ جہاد بہ کن انت۔ ایشانی سبب ءَ پاکستان ءَ یک مزنیں مذہبی ٹکّے جوڑ بوت، ہر کس افغانستان ءُ کشمیر ءَ پہ جہاد ءَ سر گپت ءُ مزنین کچّ ئے ءَ جہادی تنظیم جوڑ کنگ بوت انت کہ ایشاں پاکستان ءِ سیاست ءُ معیشت ءِ سرا ہم قبضہ کت۔ امریکہ زرّ ءُ مال دئیگ ءَ ات ،پاکستان ءِ حاکم ءُ ملّا سیر لاپ اِتنت پرچاکہ مذہب پہ ایشاں زرّ ءُ مال کٹگ ءَ اَت۔

روس ءِ پروشت ءُ پروش ءَ پد کہ امریکہ ءَ زرّ ءُ مال ءِ دئیگ ءَ دست داشت انت گڈا ملک ءِ حاکم ءُ ملّا وت ماں وت پیڑ اِتنت۔ بازیں ٹولی جتا بوت انت، بازین ءَ جہاد یلہ کت ءُ سرپت ءُ کپت انت۔ بازینے ریاست ءَ پروشت ءُ ہلاس کت ۔ چریشاں لہتیں مذہبی گل ریاست ءَ پہ ریاستی نپ ءُ سیتانی کارمرز کنگ ءَ پشت گیتک انت ، ایشان ءَ گڈءَ طالبان نامینگ بوت۔ چہ امریکہ ءَ اسلحہ ءِ گرگ بہ بیت یا سعودی عرب ءَ زرّ، اے ملّا ءُ مذہبی ٹولی ملک ءِ حاکمانی مستریں کمکار ءُ پلّہ مرز بوتگ انت۔
بلوچانی بدقسمتی ءَ بچار کہ لہتیں سال انت کہ بلوچستان ءَ انچیں مذہبی تنظیم دیم ءَ اَتکگ انت کہ ایشاں بلوچ ءُ بلوچستان ءَ را نقصان داتگ۔بلوچ ءِ مزن مردی ، مڑاہ داری ءُ بردباری پاد مال کتگ۔ بلوچ دود ءُ ربیدگ پادمال کتگ انت ءُ بلوچان ءَ وت ماں وت ءَ میڑینگ ءُ آہان ءَ مان رُنگ راہاں پرّینتگ۔ما دیستگ کہ ڈیتھ سکواڈ ءِ نام ءَ وڑھ، خضدار، پنجگورءُ تربت ءَ بلوچ وانندہیں رہشون جنگ ءُ کشگ بوت انت ، سکول ءُ وانگ جاہ بند کنائینگ بوت انت۔ تربت ءَ مسلمانانی ذگری فرقہ ءِ مردمانی سرا اُرش کنگ ءُ کشگ بوت انت۔ بازیں بلوچ سیاسی رہشون ملّاہیت ءِ نام ءَ جنگ ءُ گار کنگ بوت انت ۔ اے عمل ءَ بلوچ ءُ بلوچستان ءِ کاز ءَ را مزنیں تاوانے دات بلئے آفرین انت بلوچءِ سائیکی ءُ آئی ءِ سیاسی جہدکاراں کہ آہاں اے عمل ءَ را نہ ایوکا رَرد لیک اِت بلکن ءَ ایشی ءِ خلاف ءَ عملی جہد ہم کت۔ پمیشکا ما دیست کہ ماں مکران ءَ اے مذہبی تب ءُ مئیل ءِ ردیں گامگیج دارگ بوت حالانکہ اے گپ ءَ ہچ شک نیست اَت کہ اے تنظیم ءُ ڈیتھ سکواڈاں ریاست ءِ چیریں ادارگانی کمک گون ات ءُ ہمے سبب ءَ ایشاں ردوم زرتگ اَت۔

گوستگیں روچاں مکران ءَ مردے کہ نام ئے سید احسان شاہ انت ءُ وت ءَ را سیاسی سروکے لیکیت۔ اے مرد ءَ وتی سیاسی کمپئین ءِ درگت ءَ یک برے پدا مہلوک ءَ را مذہب ءِ نام ءَ ووٹ گرگ ءِ ناشریں دود بندات کت۔ آئی ءَ وتی مخالف پارٹی ءِ امیدوارانی خلاف ءَ کفر ءِ فتوا داتگ ءُ وتارا ملّا ءُ عالم گوشتگ۔ یک آڈیو کلپ ءِ وسیلہ ءَ وہدے من ءَ اے گپ سر بوت انت تہ من ءَ پدا ہما گوستگیں دور یات اتک انت کہ چوش نہ انت کہ یک برے پدا بلوچ ءَ را مذہب ءِ نامءَ وت ماں وت میڑینگ ءِ پندل ءِ ساز گ بُوئگ ءَ انت؟ پرچیکہ اے دانک چہ انچیںمردے ءِ دپ ءَ اِش کت انت کہ آئی ءَ وتی گیر ءَ مسیت ءِ دپ کم دیستگ۔ آئی ءِ شپ چوں گوز انت ءُ روچ چوں ،ہر کس زانت۔
سید احسان شاہ کہ مروچی کافری ءِ سند ءُ سرٹیفیکٹ بہر کنگ ءَ انت، آ کئے انت۔ آہما مرد انت کہ گوں بلوچانی بدواہاں ہم کوپگ انت۔ کئے نزانت کہ اے مرد بلوچانی کُشت ءُ کوش ءِ کاراں گون انت۔ ایشی ءَ کئے نزانت کہ اے مردسرکاری ادارہانی دلّار ءُ ایجنٹ انت۔ بلوچ مڑاہ دار ءُ برداشتی ئیں قومے بلے احسان شاہ ءَ ہر کس زانت کہ آئی ءِ دست بلوچانی حونانی رنگین انت۔ منی گوں آئی ہمے صلاہ انت کہ بلوچ ءِ پہ مذہب ءِ نام ءَ میڑینگ ءِ کاراں دستاں مان مہ کنت کہ اے شریں کارے نہ انت۔ بلوچ وتی دوزواہ ءُ بدواہاں شرّ زاننت۔ چوش مہ بیت کہ بلوچ ءِ دست ہمے احسان شاہ ءِ زنچک ءَ سک بہ بیت ءُ مرد ءَ را تچگ ءَ راہ بہر مہ بیت۔

گچین کاریاں وتی ءُ وتی پارٹی ءِ توسیپ، ساڑاہگ ءُ دومی امیت وار ءِ سیاسی ءُ نظریاتی حرابیانی پدر کنگ حرابیں گپے نہ انت بلے اے کار بایدیں پہ پلینڈی ءُ مناپکی ءِ پشدر ءَ مہ بیت پرچیکہ اے یک گرانیں راجی ءُ چاگردی ملامے ءُ چہ احسان شاہ وڑیں دلّار ءُ بلوچ دژمناں اے کار شر نہ انت۔
بایدیں اے وڑیں سرکاری پارٹیانی مردم مذہب ءِ نام ءَ کارمرز کنگ ءُ وتی ذاتی نپ ءُ فائدگ گرگ ءِ اے سلگتیں کار ءَ دوربہ بنت۔ اے ہما مرد انت کہ گوستگیں بیس سال انت بلوچ ءِ نام ءَ حاکمی کنگ ءَ انت بلئے بلوچ مہلوک بزگ ءُ وار انت۔ اے لیڈراں پہ وت زرّ ءُ مال کٹّیتگ ءُ بلوچ ءِ گدان آس داتگ انت بلئے نوں یک برے پدا کہ ایشان ءَ وتی حاکمی ءِ برجا دارگ ءَ ووٹ ءِ زلورت انت گڈا مذہب ءِ نام ءَ بلوچان ءَ میڑینگ ءِ پندلاں سازگ ءَ انت۔ بلوچ ایشانی دروگیں پندل ءَ بہ مار انت ، ایشان ءَ پاشک بہ کن انت ءُ چہ وتی سرپاں در بہ کن انت۔
(waliabden1990@hotmail.com)

Share on :
Share

About Administrator

Check Also

پی ایس ڈی پی بارے آگاہ کیا جائے، بی ایس پروگرام پر صوبے بھر میں یکساں عمل درآمد کیا جائے، بلوچستان اسمبلی

کوئٹہ: بلوچستان اسمبلی کا اجلاس چالیس منٹ کی تاخیر سے ڈپٹی سپیکر سردار بابر موسٰی …

Leave a Reply

'
Share
Share
Social Media Auto Publish Powered By : XYZScripts.com