Home / Archives / آشوپ ءِ سروک – عطاشاؔد
عطاشاؔد

آشوپ ءِ سروک – عطاشاؔد

اے هفتگے شعر

سْیہ شپیں ظلم ءَ، مکہّیں ڈیہہ ءِ ماہکان
گار بیت روش ءَ جمبریت ہاریں استماں
قہریں تامور ءَ، چیر ءُ سر بیت انت آسماں
تلوسیت ایر دستیں الس زنگ زاریت جہاں
آسیاب ءَ زوراکی ءِ رنجیت درمیاں
آسکپیں بے تاہیری ءِ ملّیں ہار بیت
ایمنیں مہرانی کشاراں پاہار بیت
روشنیں امیت ءِ چراگ دنزاں گار بیت
دژمنیں سرگْوات ءِ زر ءَ حب ءِ شار بیت
واہگ ءِ سارتیں دامن ءَ ظلم آسگْوار بیت
تب مکّشیت ءُ دل ملوٹیت آدور بیت
شہد درشانوکیں زبان ءِ گپ جور بیت

گُلزمین تُناّپ ءَ مریت انگت ہور بیت
مرگ ءِ اندیشاں زندمانیگ ءِ طور بیت
جمبران قہر ءِ ہمبوئیں اوست ءِ پور بیت
ماں چشیں آس شانیں شپاں روچاں جاہ دنت
استمان ءِ بخت ءِ ہتم نوداں راہ دنت
مرتگیں مہرانی کشاران ءَ ساہ دنت
ایردستی ءِ ناتبیں آدم دْراہ بیت
تنگہیں بچ پہ استمان روچ ءُ ماہ بیت
دل مدامیگ انت پہ چشی آشوب ءِ سروک
چم زروک انت پہ سرمچاریں چماّنی روک

دپتر (کُلیات عطاشاؔد) گلزمین – بلوچی اکیڈمی کوئٹہ

Share on :
Share

About Administrator

Check Also

انسانی حقوق کی تنظیموں کا برلن میں بلوچستان حوالے کانفرنس کے انعقاد کا اعلان

لندن: بلوچستان کے عوام کے حقوق کے تحفظ اور فروغ کے لئے کام کرنے والی …

Leave a Reply

'
Share
Share
Social Media Auto Publish Powered By : XYZScripts.com