Home / Archives / زہیرانی زارہ – عطاشاؔد

زہیرانی زارہ – عطاشاؔد

بیاکجائے! منی سچکانیں حیال ءِ اوتاگ
چم کدی بنت تئی ارمانی ئیں دید ءِ محرم
ارس ءُ اولمب بیت پمن اے زہیرانی ہتم
من پہ چوشی شپی پاساں گوں رگاماں پیڑیں
روچ آسانی، ءُ ’’رولہ ‘‘ چو منی انگریں زرد
من چو بے سار ءُ گنوک ءَ گوں خیالاںجیڑیں
شے مریدے من نہ اوں مکّہ ءِ دربند ءِ کپوت
جام دُرّک من نہ اوں، دْرین من ءَ حال نہ دنت
مست ءُ شیداؤں چومست ءَ بلے تئی مہذب ءُ نشک
حانیؔ ءُ سمیؔ ءُ سنگینؔ ءِ وڑ ءَ یات نہ انت
تو منی دوشی ئیں واب ئے کہ شمشتگ مرچی
یا گُشئے رپتگیں زند ءِ تو منی ہمراہ ئے
یاکہ مہر ءِ ہما گال ئے، کہ دل ءَ کئیت ءُ نئیت
چو سمین ءِ گلیں زیمل، ماں دناں بیگْواہ ئے
شپ چراگ ئے کہ شپاں شہم بدنت، گار بہ بیت
چو گروک ئے کہ نزاناں ماں کجام بند ءَ اِنت
ہما نوک ئے، کہ درا اِنت، ودی بوت نکنت
یا ہما بام، کہ بے جمر ءُ ہؤر ءَ چیر اِنت
تو چو ملاّءِ یقین ئے کہ نزانت وت چون انت
یاکہ، حاوند، ءِ ودار ئے کہ، کدی پیلو بیت
یاکہ بُت جوڑ کنوک ءِ تو گُشئے رپتگیں یال،
یاکہ چو عاشق ءِ ارس ئے کہ دل بیت ءُ رچیت
بیا کجائے! منی آزردیں نصیب ءِ او گواش
چم کدی بنت تئی ارمانی ئیں دید ءِ محرم
ارس بنت چم چوں مانشانتگیں ساہگ ماں سرءَ
لہڑ بیت دل چوغم ءِ گْواتگریں آسے ماں جہاں
ہچ نزاناں کہ کجا انت منی منزل، منی راہ
گار ءُ گمساراں مں امروز ءِ تلا رانی زہاں
کد پہ کیفاں اے غم آماچیں دل ءَ سہڑیناں
کد اَملاّں مں پہ تئی تنگویں دْروشم بہ زرّاں
پہ خمار چمی ئیں کاڑانی شفاریں بیکاّں
پہ کہیب لہری ئیں شارانی عبیریں گْواتاں
بیا کجائے! منی سچکانیں حیال ءِ اوتاگ
بیا کجائے! منی آزردیں نصیب ءِ اوگواش
چم کدی بنت تئی ارمانی ئیں دید ءِ محرم

دپتر (کُلیات عطاشاؔد) گلزمین – بلوچی اکیڈمی کوئٹہ

Share on :
Share

About Administrator

Check Also

“Cowards die many times before their deaths”

By Kachkol Ali The paper entitled, “The Pure Theory of Law” is helpful to understand …

Leave a Reply

'
Share
Share
Social Media Auto Publish Powered By : XYZScripts.com