Home / Archives / بلوچ ءِ دود ءُ ربیدگ یا بلوچیت – دومی بہر

بلوچ ءِ دود ءُ ربیدگ یا بلوچیت – دومی بہر

زبیر بلوچ

انچو کہ ڈاکٹر جمیل جالبی گوشگ ءَ ات کہ کلچر زند ءِ سرجمیں چست و ایرانی نام انت ءُ دیگہ سماجی علوم ءِ زانتکار گوشگ ءَ انت کہ کلچر زند گوازینگ ءِ وڑ انت۔ بیزاں lifestyle ئے بالکل ہمے وڑ انت ۔ جست ایش انت کہ انسان وتی زند ءَ چون گوازین ایت ۔ آئی ءِ ہرروچگیں سُروپُر چے انت ءُ چتور انت ۔انسان ءِ ودی بوھگ ءِ دود مرگ ءِ دود نندگ ءُ پاد آہگ، ورگ و وردن، تروتاب، سیل وسواد ہرروچ کارمرز بوتگیں ازباب جنین آدم مردین آدم چُک و چوریگ کسان و مزن ہمسائیگ ءُ ہمراہ مساپر ءُ راہ گوْزانی تابیل گرگ آہاں گوں پیش آہگ اے درس کلچر انت ءُ ہر راجے وتی وتی ھساب ءَ اے کاراں کننت ۔

کلچر بدل بیت اسل ءَ کلچرے بدل بوھگ کلچرے شرّی شمار بیت ۔ اے گپ پہ کلچر ءَ شرّی ئے کہ وہدا گوں بدل بہ بیت ۔ ہمری ءُ زندی یک وڑا مہ بیت ۔ کلچر چوں بدل بیت اے مزنیں جست ئے بلے کلچرے مزنیں بدلی گوں مادی دیمروئی ءَ بندوک انت اگاں یک راجےمعاشی ھساب ءَ دیمروئی کنت گڈا آئی ءِ پیسرئیگیں ءُ پدمنتگیں زمانگی کلچر پشت نہ کپیت ۔آئی ءِ کلچر مٹ بیت ۔ جغرافیہ و موسمی حالات اوں کلچر ءَ مٹ کن انت ۔ مادی کلچر بہ بیبت یا غیر مادی کلچر ہردو معاش ءِ دیمروی ءَ گوں مٹنت بدل بنت ۔

عربستان ءِ بلوچ چہ بلوچستان ءِ بلوچاں سیر ءُ آباد تر انت پمشکا ہودے بلوچانی زند گواٰزینگ ءِ وڈو ڈول دیگرے ۔کبلہی بلوچستان ءُ اوگنستان ءِ بازیں ہند و دمگ چہ مئے دمگاں سرد تر انت۔ ہودے بلوچانی زندمان دیگہ وڑ ءُ پیم انت ۔آوانی ورگ، آوانی پوشگ، آوانی ھر روچی ایں زند، آوانی سیروسانگانی دود کل وتی ھالاتانی ھسابءَ انت ۔

کلچرے دیگہ یک اہمیں تکے ایش انت کہ یک راجے ءِ تہنا یک ھاسیں کلچرے نہ انت ۔بلکیں یک راجے ءِ بازیں کلچرے بوت کت کنت ۔ کبلہی ءُ رودراتکی مکران ءِ بازیں زند گوازینگ ءِ وڑ و ڈول ہمدپ نہ انت ہمے ھساب ءَ جھالاوان ءُ سروان ءُ رخشان ءِ بلوچانی بازیں دود یک وڑیں نہ انت۔ پدا مہ چارایں کراچی ءِ، ڈیرہ غازی خان ءِ، مری ءُ بگٹیانی ءُ سندھ ءِ بلوچانی زند ءُ مرگ، سیر ءُ سانگ، زیمل ، دوچ، ورگ وردن، سہت و زیور ءُ ھر روچگیں سُروپر کل جتا جتا انت ۔اے ہمے گپ ءِ پلا مرزی ءَ کن انت کہ یک راجے ءِ یک اوشتانکیں کلچرے نہ بیت بلکیں یکیں وہدا باز کلچر بنت ۔

کلچر کدی stangnant بیت کت نہ کنت اگاں کلچر یک جاھاے ءَ بہ اوشتیت گڈا بزاں کلچر ھلاس انت ۔ کلچر بدل بوھوکیں چیزے۔ ھر وہد ءَ بدل بوھگ ءِ توک ءَ انت ۔ زندگیں کلچرانی توک ءَ بدلی کیت نوکیں چیز ھوار کپیت ۔وتارا مٹ کنان کنت ۔پرے گپ ءَ گبرائینگ ءِ زلورت نہ انت ۔ اسل کار بلوچے National code انت ۔ ہمے کوڈ بلوچ ءَ بلوچ ئے کنت۔ پاگ ءِ بندگ ءُ بیست میٹر ءِ کاٹن ءِ گورا کنگ ءَ کس بلوچ نہ بیت اگاں کسے گورا مہ کننت اوں کس چہ بلوچیت ءَ در نیت ۔اسل گپ بلوچیت انت ابن کلدون ءَ ایشی ءَ ethnocentrism ءِ نام داتگ ۔ بلوچ بوھگ وتی بلوچ نشنل کوڈ ءَ گوں زند گوازینگ بلوچیت انت ۔ اگاں کسے ءِ زند گوں نشنل کوڈ ءَ ہمدپ نہ انت گڈا آئی ءِ بلوچ بوھگ شککیگ انت ۔ کلچر ہر وھد ءَ نوک بوہان کنت۔

ہلاس

Share on :
Share

About Administrator

Check Also

بلوچستان،بیرون ملک سے آنیوالے 1074 افراد کا کورونا ٹیسٹ کرنے کا فیصلہ

کوئٹہ: حکومت بلو چستان کا بیرون ملک سے آنے والے 10ہزار 743افراد کے کو رونا …

Share
Share
Social Media Auto Publish Powered By : XYZScripts.com