Home / Archives / سھودی ءَ چے بیگ انت

سھودی ءَ چے بیگ انت

نبشتہ کار: ابدلستار بُگٹی

مولمان ءِ اولی ھپتگ ءَ، بزاں گْوستگیں یکشمبے ءِ پزیر بام رنگ ءِ ساھتاں،  لھتیں گْوارچ جتگیں لشکر ءِ گلے یکپارگی ماں یکیں وھد ءُ پاس ءَ سھودی ءِ ھاسیں شھزادگانی لوگ ءَ زورانسری پُتر ات انت ءُ سھودی ءِ گْوستگیں بادشاہ ھُدامُرزی بادشاہ ابدل اللہ  بِن آزیز السھود ءِ مستریں زھگ واجہ مھمد بِن نیاپ، شھزادگ نیاپ ءِ دگہ بازیں برات ءُ ھستیں وھد ءِ سھودی بادشاہ کہ نام بادشاہ سلمان انت ئِے، آئی ءِ کسانیں برات شھزادگ اھمد بِن ابدل آزیز ءُ آئی ءِ زھگ آئی ءِ زھگ واجہ نیاپ بِن اھمد دزگِیر اش کتگ انت۔

چوناھیگا چہ سھودی ءَ نازرکیں ھال شِنگ نہ بنت چی ءَ کہ اود ءَ راجمستری نہ انت بلکیں بادشاھت ءِ سرکار انت پمیشکا اود ءَ رسانکدر ءِ بندیگ ساَک ترُند ءُ رھبند ئِے ھم باز گْران انت بلے میان اُستمانی راست تریں رسانکدر وال اسٹریٹ جارنل ءُ واشنگٹن پوسٹ ءِ ھال ءُ اھوالانی رِد ءَ ھستیں وھد ءِ سھودی بادشاہ سلمان ءِ زھگ تاجی شھزادگ مھمد بن سلمان ءَ وتی کسانیں ناکو شھزادگ اھمد بِن ابدل آزیز ءُ مستریں ناکو ھُدامُرزی مھمد بِن ابدل آزیز ءِ دوئیں مستریں زھگاں ابید پنج ءَ شھزادگ گَداری، یاگی ءُ سرتابی ءِ تھمت ءَ دزگِیر کتگ کہ اے شاھی کُٹم ءِ شھزادگ سھودی بادشاہ سلمان ءُ آئی ءِ زھگ تاجی شھزادگ مھمد بِن سلمان ءِ ھلاپ ءَ لشکری زورانسری یے بُنگیج کنگ ءَ ات انت۔ اد ءَ ما دلگوش بِہ بَہ ایں کہ 2015 ءَ وھدے کہ دیمروی کتگیں سھودی اَرب ءِ بادشاہ ابداللہ بِن آزیز السھود چہ پیرھی ءِ نادراھی ءَ بیران بیت گُڑا سھودی کانودی ءِ رِد ءَ بادشاہ ءِ مزنیں زھگ/ تاجی شھزادگ ءَ را سھودی استان ءِ بادشاہ بوگ ءَ اَت بزاں پاگ بادشاہ ءِ مستریں زھگ واجہ مھمد بِن نیاپ ئیگ اَت بلے آ وھدی تاجی شھزادگ واجہ مھمد بِن نیاپ ءَ وتی ناکو سلیمان بِن آزیز سَک دوست اَت پمیشکا سوڑگ ئِے کت کہ داں وھدے ناکو سلمان زندگ انت گُڑا ناکو سلمان سھودی ءِ بادشاہ بِہ بیت ءُ آئی ءِ بیرانی ءَ رند ءَ من سھودی ءِ بادشاہ بہ آں بلے 2017 سھودی بادشاہ سلمان ءَ وتی مستریں زھگ مھمد بِن سلمان سھودی ءِ تاجی شھزادگ کنگ ءِ جار جت ءُ سھودی سرکار ءُ لشکری تیوگیں زمہ وار وتی بچ مھمد بِن سلمان ءِ دست ءَ داتگ انت کہ چہ منی بیرانی ءَ رَند منی جِند ءِ زھگ سھودی اَرب ءِ بادشاہ ءُ پاگواجہ بِہ بیت نیکہ کہ پد ءَ گْوستگیں بادشاہ ابداللہ بِن ابدل آزیز ءِ زھگ بہ بنت بزاں اے مزنیں پرّامَگی ٹَوکے بلکیں بلاھیں گَداری یے کہ بایدانت سھودی ءِ بادشاھت راستیں ھکدار ءَ بہ رس ایت کہ ھما اولی بادشاہ ابداللہ بِن ابدل آزیز ءِ زھگ مزن شھزادگ مھمد بِن نیاپ انت نیکہ شھزادگ مھمد بِن سلمان انت۔مرچی سھودی بادشاہ سلمان ءَ وتی مستریں برات ھُدامُرزی ابدللہ بِن ابدل آزیز ءِ پنج ءَ زھگ(سھودی ءِ گْوستگیں بادشاہ سی سور کتگ اَت پمیشکا آئی ءِ چہ پنج گیشتر زھگ انت) ءُ وتی کستریں برات  شھزادگ اھمد بن آزیز چہ لوگاں تیلانکاں دیان ءَ بُرتگ اش۔

چہ ایشی ءَ پیش2017 ءَ ھم بادشاہ ءِ زھگ شھزادگ مھمد سلیمان ءَ سھودی بادشاھی کُٹم ءِ دگریں بازیں شھزادگ ءُ شھکاروباریانی سر ءَ سِلکاری ءِ تھمت جتگ انت ءُ آ دزگِیر کتگ ات انت البت رند ءَ آ دراہ یک یکی ءَ یلہ دیگ بوت انت بلے اے اولی رَند انت کہ سھودی بادشاہ ءِ شاھی کٹم لاپ ءَ کسے ءَ را گَدار ءُ یاگی بوگ ءِ بھتام ءُ تھمت جنّگ بوگ انت۔
 
اگاں ما سھودی اَرب ءِ کانودی رھبنداں بہ چار ایں گُڑا ما زان ایں کہ سھودی استان ءِ کانودی رھبندانی رِد ءَ گَداری ءُ یاگی ءِ مُز کُشگ ئیگ انت ءُ دومی سھودی گناھگار ءَ ھچ بر نہ بکش ایت، بزاں نی باشاہ سلمان ءُ آئی زھگ شھزادگ سلمان بِن مھمد سھودی اَرب ءِ اے تیوگیں پنجائیں شھزادگاں کُش ایت کہ لھتیں ایشی ءِ ناکوزتک ءُ لھتیں ناکو اَنت ؟ چوناھیگا اے بادشاھت ءِ جنگ انت کہ سھودی شھزادگ مھمد بِن سلمان لوٹ ایت کہ پِت ءِ مرگ ءَ رند سھودی اَرب ءِ بادشاہ من وت بہ بہ آں پمیشکا سھودی ٹیل ءُ گیس ءِ سرکاری کارجاہ ءُ سھودی لشکر ءِ لاپ ءَ وتی ھکم ءِ مھکم کنگ ءِ ھاتر ءَ دگریں شھزادگاں زیر دیگ انت کہ شاھی کٹم ءِ لاپ ءَ آیانی ھچ ارزِشت ءُ بستارے مہ بیت۔ انچوشکہ کہ بازیں ھالکارانی رِد ءَ نود سال اُمر ءِ سھودی بادشاہ سلمان سَک نادراہ انت پمیشکا آ ءُ آئی ءِ زھگ شھزادگ سلمان لوٹ ایت کہ تیوگیں سھودی شاھی آمیدگِس ءِ لاپ ءَ منی جِند ءِ منّوگِر باز بہ بنت کہ چہ پِت ءِ مرگ ءَ رند من بادشاہ بِہ بہ آں۔ بلے سھودی لس مھلوک ءُ دمگ ءِ ٹکری دراہ وَ زان انت کہ چہ مھمد بِن سلیمان ءِ راجی شوندات ءَ سھودی روچ پہ روچ پُشت ءَ روان انت۔سھودی شاھی کُٹم ءِ تیوگیں شھزادگ یمن جنگ ءَ ناوش انت، ھاسکن مھمد بِن سلمان ءِ ناکو زتک مزن شھزادگ مھمد بِن نیاپ ءُ کسانیں ناکو شھزادگ اھمد بِن ابدل آزیز ءَ بازیں براں ماں گْوشتانکاں گْوشتگ کہ یمن ءِ جنگ ءَ بادشاہ ءُ آئی زھگ شھزادگ مھمد بِن سلمان، سھودی زَر ءُ مڈّیاں بے دردی ءَ تاوان کنگ ءَ انت ءُ ناھک ءَ یمن ءِ بزگیں لس مھلوک ءَ، چہ دھَک ءَ کشگ ءَ اَنت چریشی ءَ سھودی تیوگیں اَرب گیدی ءَ بنام انت بلے انگت ھوتی جنگولاں سھودی ٹیل ءُ گیس ءِ چاتانی سر ءَ سوبمندیں اُرش کت انت ءُ سھودی ءَ را بے کساسی زَری تاوان اش داتگ۔ اے دائم ءُ بے ھلاسی ئیں یمن جنگ ءَ سھودی سی ءُ شش لگوریں مسلمانانی پوج ءَ جنگی ھرچگاں دنت ءُ چہ امریکہ ایدگہ بازیں یورپی استاناں جنگی سِلاہ ءُ بالیگراباں گْرانبھا زُور اَنت۔۔۔۔

پمیشکا امریکی پاگواجہ واجہ ڈونالڈ ٹرمپ ھستیں وھد ءِ بادشاہ سلمان ءُ آئی ءِ زھگ شھزادگ مھمد بن سلمان ءَ وَاھیر کنت۔بزاں اے چہ کرنانی وھد ءَ اولی رند انت کہ سھودی شاھی کٹم بے کساس ناتپاکی ءِ آماچ انت۔ مرچی چہ کرونا ویروس ءِ ترس ءَ مکہ شریپ  ءُ سھودی ءِ بازیں کارجاہ ھم بند انت ءُ دومی سھودی ءُ روس ءِ ٹیل ءُ گیس ءِ جیڑھانی سوب ءَ سھودی ءَ وتی تیل ءِ نھاد ھم جھال ءَ پِرینتگ اَنت بزاں 110 ڈالر یک ٹیل بیرل ءَ کمتر کتگ ءُ 30 ڈالر یک ٹیل بیرل ءَ آؤرتگ ئِے  گْوش ئے سھودی ءِ ھرابیں وھد زیتیں روچاں تْرُند بِیان بنت۔ چوناھیگا مردم گْوش انت کہ ھر ھر پرون ءَ رند یک موسایے کیت۔ اے ھما سھودی انت کہ تیوگیں اوگانستان ءَ بہ گِر داں اِیراک، لیبیا، پالیستین، سوریا، یمن ءُ تیوگیں اَرب استاناں آس مان داتگ ئِے بزاں نی کَے بزانت کہ یمن جنگ ءِ ھرچ ءُ میانجی ئیں رودرآتکی ءِ زوراکیں آشوب سھودی شاھی کُٹم ءَ کجام جھندم ءَ سر کنت۔

Share on :
Share

About Administrator

Check Also

بلوچستان،بیرون ملک سے آنیوالے 1074 افراد کا کورونا ٹیسٹ کرنے کا فیصلہ

کوئٹہ: حکومت بلو چستان کا بیرون ملک سے آنے والے 10ہزار 743افراد کے کو رونا …

Share
Share
Social Media Auto Publish Powered By : XYZScripts.com