Home / Archives / ‎بلوچ و بلوچ اے زبان

‎بلوچ و بلوچ اے زبان

قدیر ساگر

زبان بنی آدم ءِ درنگازگ ءِ یک ءُ تہنا ایں وسیلہ انت کہ آ وتی ھیالاں درشان کنت۔ دگنیا ءَ کجام اوں راج بیبت آ الّم زبانے داریت۔ زبان بنی آدم ءِ گوستگیں پدریچانی جہد ءِ آسر انت کہ نوکیں پدریچ ءَ کیت ءُ سر بیت۔ زبان پشت در پشت راجاں گوں ھمگرنچ انت ءُ سپر کنان انت ءُ بنی آدم ءِ زبان راجمان ءَ گوں پیوست انت۔ ہما روچ ءَ کہ بنی آدم اشکنگ بندات کنت ہما روچ ءَ چہ زبان بنی آدم ءِ زندمان گوں ہمگرنچ بیت۔ چہ گوانزگ ءَ بگر داں عمر ءِ ہمک سپر ءَ کجام اوں موسم ءَ گوں دوچار بہ کپیت گڈا گیشتر وتی زبان آئی ءَ اسرمند کنت اے نیام ءَ لیلو، سپت، نازینک، موتک، زہیروک، امبا، اھدی اشکی جنگی شائری، داستان ءُ کسہ، زیمر ، تامر ءُ ایدگہ گوں چاگرد ءَ ھمگرنچیں مڈی مردم ءِ دلگوش ءَ گوں وت برنت ءُ گیشتر اے ماتی زبان ءَ بنت ۔ انچو کہ ُچک ءِ اولی وانگجاہ مات ءِ کُٹ ِانت ءُ مات آئی اولی سوجکار انت ۔ ھمے ماتءِ زبان کہ چہ آئی ءَ ُچک ھرچیز ءَ ھیل کنت ماتی زبان گشگ بیت، پمیشکہ ماتی زبان چو مات ءَ زندگیں راجاں دوست انت۔

‎ماتی زبانانی پشدر ءَ کمے اگاں چمشانکے بدی یے گڑا ما گندیں کہ زبانانی زندگ دارگ ءَ زبان ءِ گپ جنوکاں وتی تنگویں جان اوں ندر کتگ انت انچو کہ بنگلہ دیش ءَ بیست ءُ یک فروری 1952 ءَ پہ بنگالی زبان ءِ ھاترا مکتباں روانکے کش َات، آ وھد ءَ بنگلہ دیش پاکستان ءِ قبضہ ءَ بیت،، روانک ءِ مردمانی لوٹ ایش بیت کہ بنگالی راجی زبان منگ بہ بیت اے روانک ءِ سرا پاکستان ءِ واکدار ءُ سپاھیگ تیرگواری کن انت چرآئی سبب ءَ چار بنگالی مکتبی بیران بی-

‎پمیشکہ 17 نومبر 1999 ءَ اقوام متحدہ ءِ دود ربیدگ، تعلیم ءُ سائنس ءِ دیما بروکیں گل یونیسکو ءَ 21 فروری ماتی زبانانی میاں استمانی روچ گچین کت ءُ ھرسال اشیءِ دارگءِ جار جت۔
‎اے مھرانت گوں زبان ءَ راجاں ماں راجدپتر ءِ دلبند ءَ نمیران کنت۔

یونیسکو ءِ گوشگ ءِ رد ءَ اے وھد ءَ سرجمیں دنیا ءَ شش ھزار زبان ءَ گپ جنگ بوھگ ءَ انت۔ اشی تھا یک سد ءُ نود ءُ نو انچیں زبان انت کہ آیانی گپ جنوک دہ یا دہءَ کمترانت ءُ یک سد ءُ ھپتاد ءُ ھپت انچیں زباناں کہ آیانی گپ جنوک دہ یا پنجاہ مردم ءِ کچءَ بنت ۔

‎ دنیا ءِ دوھزار ءُ پنجاہ زبان ھما َانت کہ گمان کنگ بیت آ گار بہ بنت ۔دنیا ءِ ھما زبان کہ آیانی گاری ءِ ترس انت چرآیاں یکے بلوچانی دومی زبان براہوی انت ۔ بلوچی اے لڑ ءِ تھا ھوار نہ انت کہ بلوچی ءَ گیشتر اے ھوالہ ءَ کار بیتگ ۔ بلوچ جاورانی جنتر ءَ درشان ءَ اے جاہ ءَ سرانت۔ آپرین انت وتی کم دزرسی ءَ زبان ءِ زندگ دارگ ءِ جھد ءَ انت ۔

‎زبان ءِ دیما برگ تھنا لبزانک، زیمل، تامرءُ سیاستءَ ھمگرنچیں مردمانی زمہ نہ انت ۔ زبان ءِ دیم ءَ برگ بلکیں ُکل ھما زبان ءِ گپ جنوکیں مردمانی زمہ واری انت کہ زبان ءِ زندگ ءُ دیما برگ ءَ وتی کرد ءَ پیلو بکن انت۔

‎بد بھتی ایش انت کہ راجے وتی سرڈگار ءِ واھند مہ بیت دری راجے آئی سرا قبضہ بکنت ءُ وتی دری زبانءَ پہ زور ءُ ھنر زورگپتگیں راج ءِ سرا مشگ ءِ جھد ءَ بکنت۔ ‎تہ چشیں ساھتاں زبان ءِ زندگ دارگ ءَ پہ راج ءِ زمہ واری گیشتر بنت۔ پرچہ کہ زبان بیت راج بیت راج بیت سرڈگار بیت ۔

‎،،بلوچ، بلوچی ءُ بلوچستان میزراں بات ،،

قدیر ساگر یونان ءَ بی۔این۔ایم ءِ آرگنائیزر انت ءُ بلوچی ءِ لبزانک ءَ گوں ہمگرنچ انت۔

Share on :
Share

About Administrator

Check Also

بلوچستان،بیرون ملک سے آنیوالے 1074 افراد کا کورونا ٹیسٹ کرنے کا فیصلہ

کوئٹہ: حکومت بلو چستان کا بیرون ملک سے آنے والے 10ہزار 743افراد کے کو رونا …

Share
Share
Social Media Auto Publish Powered By : XYZScripts.com